(1908) Intervieu
link (nº 60 y 61)
En llagar de la tía Xica
Sentaos co la masera,
Estaben bebiendo sidre
Xuan, Celesto y Topinera.
Xuan- Xica, echa otros tres vasos
Topinera- Mejor nos dá una puchera,
Celesto- Paezme qu'entovía sorbemos
Media zumbre por cabeza.
Xuan- Tienes razón, que carai,
De 'star secos tiempu queda.
Topinera- Ye verdá hom, yé verdá...
toma aquesi xarru, y llena.
Celesto- Callá que vien Lín de Lón
Subiendo pe la caneya
Y ye capaz dicir 'n Ecu,
Que tenemos borrachera.
Xuan- ¡Chis! que ya está baxu el horru
Topinera- ¿Debaxu el horru? qu'estea.
Lín- Güenes tardes vos de Dios,
Todos- Dei á esi una puchera,
Lin- Gracies, ahora non bebo
Porque duelme la cabeza;
Lo que si quiero é saber
Si tenés delguna quexa
Del gobiernu, del estau,
Del municipiu, la escuela,
Del xuzgau, del celador,
Del fisca de satisferia,
De toos los empleaos
Sin raparu, sea quien sea.
Non vengués con arromicos
Como facen Xunco y Riera,
Que paez que los dos van
Fuxendo de la pelea.
Vosotros habes dicir,
Ce por be lo que convenga,
Y dar como manda Dios
A cad' un lo que merecia.
Non habes echar n'olvidu,
Pes ye mester que se sepia,
Quien fui causa de los males
Que aflixen la nuestra tierra.
Dicí á voces sin temor
En medio de 'sta tabierna,
Quien fui ó yé 'l desalmau
Que nos fai estar en guerra.
Si de min sabes daqué,
Sácame el primeru á escena,
Y dici al pueblu que xuzge
Imponiéndome la pena;
Non tengués mieu de que apele;
Yo quiero paz y non guerra,
Y sobre tou que á Cabranes
Y demos cuantu convenga
Xuan- Déxama falar a mín...
Me futro 'na pena negra,
Ahora voi á dicir yo...
Celesto- Mejor lo diz Topinera
Que 'sta daqué destruiu;
Topinera- Hablaré si Lón me dexa.
Xica- Yo quierro cerra 'l llagar,
Que ye tardi y tengo priesa.
Lin- Güeno, pes vamos dexalo
Pal primer Ecu que venga.
Celesto- Güeno, ya estamos aquí,
Puedes falar Topinera.
Topinera- Tomaremos un cuartillu
Mientres Xuan de Rives llega.
Lin- Por aquesi no esperés;
Pos según dixo Carmela
Enfadose'l otru día
Y entós val mas que non venga.
Topinera- Tienes razón, vo empezar,
Escríbi y pón güena lletra.
Nací fará cincuenta años,
Y dende tan llarga fecha
Non vi 'n aquesti Conceyu
Más que llástima y miseria.
Si nos piden la camisa.
Pa facer dalguna cuenta
Del Estau, del municipiu,
Del xuzgau ó de la iglesia,
Dámosla sin retrucar
Anque non haiga más qu'esa;
Pero encambiu non tenemos
Casi, casi... nin vergüenza.
Lin- Fala con serenidá...
Topinera- Non puedo, más que quisiera;
Yo que soy de Santolaya
Pueblu que llamen cabeza
Del conceyu, y non tenemos
Agua que beber siquiera;
Equi que tou son caleyes,
Que non hay casa de escuela,
Nin juente, ni abrevaderu,
Nin mercau, nin carretera,
Y si queremos llevamos
Pa 'sistir á alguna fiesta
Hay que meter el focicu
Metanos en cualquier riega...
Esto... repuño, é tremendu.
Celesto- ¡Sigui... sigui, Topinera!
Topinera- Y'agora vó descubrir
Quien tien la culpa ¡pujeta!
Lin- Y son muchos los culpables?
Topinera- Han de pasar d'un ocena;
Por que empezaren á selo
Los que al fer la carretera
Que de la Villa al Infiestu
Vieno por desgracia nuestra
Fuxendo por castañeos
Sin ver un poblau siquiera;
Lin- Y llegarás de seguru
Hasta la custión postrera
Que sacaren á la lluz
Los parientes Xunco y Riera.
Celesto- Yo non puedo esperar tantu
Que vendrá la mió costiella.
Topinera- Güeno, pes vamos dexalo
Pa l'entrevista primera.